بین الاقوامی فراڈ میں ملوث غیر قانونی کال سینٹر پر چھاپہ، 9 ملزمان گرفتار

نیشنل سائبر کرائم انویسٹی گیشن ایجنسی (NCCIA) لاہور سرکل نے کارروائی کرتے ہوئے بین الاقوامی سطح پر شہریوں کو لوٹنے والے ایک غیر قانونی کال سینٹر کا پردہ فاش کر کے 9 ملزمان کو گرفتار کر لیا ہے۔ ترجمان این سی سی آئی اے کے مطابق ملزمان مشہور غیر ملکی ٹیلی کام کمپنیوں کے نمائندے بن کر سادہ لوح برطانوی شہریوں سے مالی فراڈ میں ملوث تھے۔ چھاپے کے دوران ملزمان کے قبضے سے 5 لیپ ٹاپس اور 10 موبائل فونز سمیت جدید مواصلاتی آلات برآمد کر لیے گئے ہیں۔

تحقیقات کے دوران انکشاف ہوا کہ ملزمان آن لائن آٹو ڈائلر، VOIP اور WebEx جیسے جدید سافٹ ویئرز کا استعمال کر کے برطانوی شہریوں کو نشانی بناتے تھے۔ ڈائریکٹر جنرل این سی سی آئی اے سید علی ناصر رضوی نے واقعے پر سختی سے ردِعمل دیتے ہوئے کہا کہ پاکستان کی سرزمین کو کسی صورت عالمی سائبر فراڈ کے لیے استعمال نہیں ہونے دیا جائے گا اور بیرون ملک ملک کی بدنامی کا باعث بننے والے عناصرمعافی کے مستحق نہیں۔ ملزمان کے خلاف مقدمہ درج کر کے مزید تفتیش شروع کر دی گئی ہے۔