پاک فوج کی قربانیوں پر کوئی شک نہیں: نواز شریف

پاکستان مسلم لیگ (ن) کے صدر اور سابق وزیرِاعظم نواز شریف نے باطل اور دہشت گرد عناصر کے خلاف جنگ میں پاکستان Armed Forces کی قربانیوں کی زبردست تعریف کرتے ہوئے کہا ہے کہ پاک فوج کی عظیم قربانیوں پر کسی قسم کا کوئی شک و شبہ نہیں ہے۔

لندن میں اپنی رہائش گاہ ایون فیلڈ سے روانگی کے موقع پر صحافیوں سے گفتگو کرتے ہوئے سابق وزیرِاعظم نواز شریف نے پاک فوج کی خدمات اور سیکیورٹی صورتِ حال پر ردِعمل دیا۔ ملک میں جاری دہشت گردی اور پاک فوج کے کردار سے متعلق پوچھے گئے ایک سوال کے جواب میں انہوں نے کہا کہ “پاک فوج کی قربانیوں پر کوئی شک ہی نہیں ہے، ہمارے جری جوان اور افسران بڑی دلیری کے ساتھ میدانِ جنگ میں لڑ رہے ہیں”۔ انہوں نے وطن کی خاطر جانوں کا نذرانہ پیش کرنے والے شہداء کے لیے دعائے مغفرت کرتے ہوئے کہا کہ اللہ تعالیٰ شہداء کو اپنے جوارِ رحمت میں اعلیٰ مقام عطا فرمائے۔

دہشت گردی کے ناسور پر گفتگو کرتے ہوئے ن لیگ کے صدر نے واضح اور سخت مؤقف اپنایا اور حکومتی و سیکیورٹی اداروں پر زور دیتے ہوئے کہا کہ جو عناصر بھی ملک میں دہشت گردی اور بدامنی پھیلا رہے ہیں، ان کے خلاف بلا امتیاز سخت ترین کارروائی ہونی چاہیے اور انہیں کسی صورت نہیں چھوڑنا چاہیے۔