نواز شریف کی ایون فیلڈ سے روانگی، کارکنوں کے ساتھ تصویریں بھی بنوائیں

مسلم لیگ (ن) کے قائد اور سابق وزیراعظم نواز شریف لندن میں اپنی رہائش گاہ ایون فیلڈ (Avenfield) سے روانہ ہو گئے ہیں۔

ذرائع کے مطابق ان کی روانگی کے وقت ان کے صاحبزادے حسن نواز اور حسین نواز بھی ان کے ہمراہ تھے، جبکہ ان کے ذاتی معالج ڈاکٹر عدنان بھی قافلے میں موجود تھے۔ ایون فیلڈ سے نکلتے وقت مسلم لیگ (ن) کے متعدد کارکنان ان سے ملاقات کے لیے موجود تھے، نواز شریف نے ان کے ساتھ تصاویر بنوائیں اور ان کا شکریہ ادا کیا۔

روانگی کے موقع پر ذرائع ابلاغ سے مختصر گفتگو کرتے ہوئے قائد مسلم لیگ (ن) کا کہنا تھا کہ “دانش اسکولوں میں غریب اور نادار بچوں کو اعلیٰ معیار کی تعلیم ملنا انتہائی خوش آئند اور خوشی کا باعث ہے”۔ انہوں نے دعا کی کہ اللہ تعالیٰ اس طرح کی تعلیم اور خوشیاں ملک کے تمام ضرورت مند طبقات کو عطا فرمائے۔