ایڈمرل نوید اشرف کا یونٹس اور کریکس ایریا کا دورہ، سی سپارک مشق کا جائزہ لیا

سربراہِ پاک بحریہ (نیول چیف) ایڈمرل نوید اشرف نے سمندر میں پاک بحریہ کی مختلف جنگی یونٹس اور دفاعی لحاظ سے اہم کریکس ایریا کا دورہ کر کے ‘سی سپارک 2026ء’ (Seaspark 2026) نامی بحری مشق کا بچشمِ خود جائزہ لیا اور فورسز کی آپریشنل تیاریوں کا تفصیلی معائنہ کیا۔ پاک فوج کے شعبہ تعلقاتِ عامہ (ISPR) کے مطابق، یہ مشق یکم ستمبر سے جاری ہے جس کا بنیادی مقصد امن کے حالات سے جنگی آپریشنز کی جانب فوری اور مؤثر منتقلی کی صلاحیتوں کا جائزہ لینا نیز ہمہ جہت بحری آپریشنز کے لیے پیش رفت کو برقرار رکھنا ہے۔

آئی ایس پی آر کے مطابق بدلتے ہوئے جدید جنگی تقاضوں کو مدنظر رکھتے ہوئے سی سپارک 2026ء میں جدت سے آراستہ آپریشنل تصورات، انفارمیشن انوائرمنٹ اور ملٹی ڈومین آپریشنز شامل کیے گئے ہیں، جبکہ پہلی بار بغیر پائلٹ کے جدید نظاموں (ڈرونز اور خودکار سسٹمز) کا بھی وسیع پیمانے پر استعمال کیا جا رہا ہے۔ نیول چیف ایڈمرل نوید اشرف نے مشقوں میں حصہ لینے والے افسران اور جوانوں سے ملاقات کی، ان کے اعلیٰ پیشہ ورانہ معیار، بلند حوصلے اور ہمہ وقت آپریشنل تیاری کو سراہا اور سمندر میں ملکی سرحدوں کے ناقابلِ تسخیر دفاع کے عزم پر اہلکاروں کو خراجِ تحسین پیش کیا۔