قومی کانفرنس: وزیراعلیٰ خیبرپختونخوا سہیل آفریدی کا آئین، معیشت اور امن پر سخت مؤقف

قومی کانفرنس کے دوسرے روز وزیراعلیٰ خیبرپختونخوا سہیل آفریدی نے خطاب کرتے ہوئے کہا کہ مسئلہ یہ ہے کہ جس کا جو کام ہے وہ وہی نہیں کر رہا۔ انہوں نے بتایا کہ خیبرپختونخوا میں جرگہ منعقد کیا گیا جس میں تمام شرکاء نے قیامِ امن کے اعلامیے پر متفقہ دستخط کیے۔

سہیل آفریدی نے کہا کہ زمینی حقائق سے نابلد افراد غلط فیصلے کر رہے ہیں اور بند کمروں میں بیٹھے منصوبہ ساز ملک کو نقصان پہنچا رہے ہیں۔ انہوں نے معیشت پر بات کرتے ہوئے کہا کہ ڈالر کو نہ روکا گیا تو قیمت 400 روپے سے تجاوز کر جائے گی، بیرونی قرضہ بڑھے گا اور ملک دیوالیہ ہونے کے خطرے سے دوچار ہو سکتا ہے۔

انہوں نے رجیم چینج کے بعد تبدیلی پر سوال اٹھاتے ہوئے کہا کہ تنقید کے ساتھ حل بھی پیش کیے جاتے ہیں۔ وزیراعلیٰ کا کہنا تھا کہ وہ تحریک تحفظ آئین کے ہر فیصلے کے ساتھ کھڑے رہیں گے اور اگر آئین کی بحالی کے لیے قربانی دینی پڑی تو وہ اس کے لیے بھی تیار ہیں۔