قومی اسمبلی کا اجلاس آج 11 بجے ہوگا، 7 نکاتی ایجنڈا جاری

قومی اسمبلی کا اہم اجلاس آج صبح 11 بجے پارلیمنٹ ہاؤس میں طلب کر لیا گیا ہے، جس کے لیے 7 نکاتی ایجنڈا جاری کر دیا گیا ہے۔

ایجنڈے کے مطابق وفاقی وزیرِ تعلیم خالد مقبول صدیقی ایوان میں ‘قومی کتاب فاؤنڈیشن ایکٹ 1972ء’ میں ترمیم کا بل پیش کریں گے، جبکہ ماحولیاتی تحفظ سے متعلق ‘پاکستان کلائمیٹ چینج ترمیمی بل 2026ء’ بھی ایوان میں پیش کیا جائے گا۔ اس کے علاوہ اجلاس میں صدرِ مملکت کے پارلیمنٹ کے مشترکہ اجلاس سے خطاب پر اظہارِ تشکر کی تحریک پر پالیسی بحث کا سلسلہ بھی جاری رہے گا۔

اجلاس میں دو اہم توجہ دلاؤ نوٹس (Calling Attention Notices) پیش کیے جائیں گے۔ پہلا نوٹس رکنِ قومی اسمبلی آسیہ ناز تنولی کی جانب سے اسلام آباد کے سیکٹر I-10 اور I-11 کے درمیان کچرا پھینکنے اور ماحولیاتی آلودگی سے شہریوں کی صحت کو درپیش خطرات کے معاملے پر ہوگا، جبکہ دوسرا نوٹس بلوچستان کے خشک سالی سے متاثرہ شمالی پشتون علاقوں میں پانی ذخیرہ کرنے کے منصوبی جات کے حوالے سے پیش کیا جائے گا۔ وقفہ سوالات میں بھی اہم عوامی امور پر بحث کی جائے گی۔