قومی ایئر لائن کی نجکاری فیصلہ کن مراحل میں داخل ہوگئی

اسلام آباد: قومی ایئر لائن (پی آئی اے) کی نجکاری کا معاملہ اپنے آخری اور فیصلہ کن مراحل میں داخل ہو گیا ہے، جس کے تحت چار بولی دہندہ کنسورشیم نے ایئر لائن کا تفصیلی ریکارڈ روزانہ کی بنیاد پر طلب کر لیا ہے۔

باخبر ذرائع کے مطابق، گزشتہ ہفتے چاروں کنسورشیم کے اعلیٰ عہدیداروں نے قومی ایئر لائن کے چیف ایگزیکٹو آفیسر (سی ای او) اور دیگر متعلقہ افسران کے ساتھ ایک اہم اجلاس کیا۔ اس اجلاس میں کنسورشیم نے ایئر لائن اور نجکاری کمیشن سے یومیہ بنیاد پر تفصیلات فراہم کرنے کی درخواست کی۔ جس کے بعد پی آئی اے کی جانب سے کنسورشیم کو موجودہ اور ریٹائرڈ ملازمین کی تفصیلات، نیز ڈومیسٹک اور بین الاقوامی روٹس سے متعلق مکمل ریکارڈ فراہم کر دیا گیا ہے۔

وزیرِ اعظم سیکرٹریٹ نے بھی قومی ایئر لائن انتظامیہ کو ہدایت جاری کی ہے کہ وہ چاروں کنسورشیم کو تمام مطلوبہ تفصیلات کی فراہمی اور ہر ممکن تعاون یقینی بنائے۔

ذرائع کا مزید کہنا ہے کہ تمام چاروں کنسورشیم 23 دسمبر کو ہونے والی بولی میں اپنی حتمی مالی پیشکشیں (بڈز) جمع کرائیں گے۔ یہ بھی واضح کیا گیا ہے کہ ریٹائرڈ ملازمین کی پنشن کی ادائیگی کی ذمہ داری قومی ایئر لائن خریدنے والے کامیاب کنسورشیم پر عائد نہیں ہو گی۔ یہ پیش رفت اس بڑے حکومتی فیصلے کے تکمیل کی جانب اہم قدم ہے جس کا مقصد ایئر لائن کو نجی شعبے کے حوالے کرنا ہے۔