وزیر بلدیات سندھ ناصر حسین شاہ کی جماعت اسلامی کے مارچ کی حمایت

وزیرِ بلدیات سندھ ناصر حسین شاہ نے جماعتِ اسلامی کے ممکنہ لانگ مارچ کی حمایت کا اعلان کرتے ہوئے کہا ہے کہ پیٹرولیم مصنوعات پر لیوی کے خاتمے کے لیے جماعتِ اسلامی کے مطالبے کا خیرمقدم کرتے ہیں۔ انہوں نے کہا کہ پیپلز پارٹی کے چیئرمین بلاول بھٹو زرداری نے بھی لیوی کے خاتمے پر زور دیا ہے اور ان کی پارٹی اسمبلی فلور پر مہنگے پیٹرول کے خلاف آواز اٹھا رہی ہے۔ ناصر حسین شاہ کا کہنا تھا کہ جماعتِ اسلامی کا طرزِ احتجاج، مارچ اور دھرنے ہمیشہ پرامن ہوتے ہیں، اس لیے ان کے مطالبات کا احترام کیا جانا چاہیے۔

پی ٹی آئی پر تنقید کرتے ہوئے صوبائی وزیرِ بلدیات نے کہا کہ تحریکِ انصاف کے احتجاج ہمیشہ پرتشدد رہے ہیں، حالانکہ تشدد کسی مسئلے کا حل نہیں ہوتا اور 9 مئی کا واقعہ ابھی بھولے نہیں ہیں۔ انہوں نے پی ٹی آئی قیادت سے التجا کی کہ وہ اپنی تحریک میں تشدد کا راستہ ترک کریں۔ ایک سوال کے جواب میں ناصر حسین شاہ نے ایم کیو ایم پاکستان کے سیاسی موقف کو غیر سنجیدہ قرار دیتے ہوئے کہا کہ ان کی پارٹی ایم کیو ایم کے بیانات کو صرف باتوں کی حد تک محدود سمجھتی ہے اور اسے کبھی سنجیدگی سے نہیں لیتی۔