دریائے کنہار میں گاڑی اتارنے والے ٹک ٹاکرز کی ضمانت منظور

سیاحتی مقام ناراں میں قانون کی سنگین خلاف ورزی کرتے ہوئے دریائے کنہار میں گاڑی ڈال کر ٹک ٹاک ویڈیو بنانے والے سیاحوں کی عدالت نے ضمانت منظور کر لی ہے۔

تفصیلات کے مطابق، دو روز قبل دم دمہ ناراں کے قریب پنجاب کے شہر شیخوپورہ سے تعلق رکھنے والے چار سیاحوں نے موج مستی اور ٹک ٹاک ویڈیو بنانے کے چکر میں اپنی گاڑی دریائے کنہار کے بپھرے ہوئے پانی میں اتار دی تھی۔ اس دوران گاڑی پانی کے تیز بہاؤ کی زد میں آ کر بہہ گئی، تاہم وہاں موجود رافٹنگ ٹیم نے بروقت کارروائی کرتے ہوئے چاروں سیاحوں کو ڈوبنے سے بچا کر باحفاظت ریسکیو کر لیا تھا۔

مقامی پولیس نے اس خطرناک لاپرواہی پر ایکشن لیتے ہوئے چاروں سیاحوں کے خلاف تھانہ ناراں میں دفعہ پی پی سی 188 (حکومتی احکامات کی خلاف ورزی) کے تحت مقدمہ درج کیا تھا۔ پولیس نے واقعے میں ملوث تین ملزمان کو گرفتار کر کے آج بالاکوٹ میں جوڈیشنل مجسٹریٹ ٹو کی عدالت میں پیش کیا، جہاں عدالت نے سماعت کے بعد تینوں ملزمان کی ضمانت منظور کرنے کا حکم دے دیا۔ پولیس کے مطابق، کیس کے مرکزی ملزم سلطان نے گرفتاری سے بچنے کے لیے پہلے ہی قبل از گرفتاری (انٹیسیپیٹری) ضمانت کروا رکھی تھی۔