نیب کی تاریخ کی سب سے بڑی ریکوری: ڈھائی سال میں 8 ہزار 397 ارب روپے وصول

اسلام آباد: قومی احتساب بیورو (نیب) نے گزشتہ ڈھائی سال کے دوران کرپشن، فراڈ اور سرکاری زمین کی غیر قانونی الاٹمنٹ کے خلاف بڑے پیمانے پر کارروائیاں کرتے ہوئے 8 ہزار 397 ارب روپے کی ریکوری کرلی، جو ادارے کی تاریخ کی سب سے بڑی وصولی قرار دی جا رہی ہے۔

ذرائع کے مطابق نیب نے مارچ 2023 سے اکتوبر 2025 تک مجموعی طور پر 8 ہزار 397 ارب روپے کی رقم قومی خزانے میں واپس جمع کرائی۔ یہ ریکوری 1999 میں ادارے کے قیام سے فروری 2023 تک ہونے والی مجموعی 883 ارب روپے کی وصولی کے مقابلے میں 10 گنا زیادہ ہے۔

اعداد و شمار کے مطابق گزشتہ 23 سال میں 883 ارب روپے ریکور ہوئے جبکہ صرف ڈھائی سال میں اس سے کئی گنا زیادہ رقم قومی خزانے میں واپس آئی، جسے نیب کی تاریخ کی سب سے شاندار کارکردگی قرار دیا جا رہا ہے۔

حکام کے مطابق رواں سال کے اختتام تک مزید 2 ہزار ارب روپے کی ریکوری متوقع ہے، جس سے مجموعی رقم میں مزید اضافہ ہوگا۔

نیب کو سب سے بڑی کامیابی لینڈ ڈائریکٹوریٹ کے شعبے میں ملی، جہاں بڑے پیمانے پر سرکاری زمین غیر قانونی قبضوں سے واگزار کرائی گئی، جس کی مالیت کھربوں روپے بنتی ہے۔