سندھ پبلک سروس کمیشن میں مبینہ بدعنوانی، نیب کراچی نے تحقیقات شروع کردیں

قومی احتساب بیورو (نیب) کراچی نے سندھ پبلک سروس کمیشن (SPSC) میں مبینہ بدعنوانی، بے ضابطگیوں اور نتائج میں ہیر پھیر کی شدید شکایت پر باقاعدہ تحقیقات کا آغاز کرتے ہوئے سیکرٹری سندھ پبلک سروس کمیشن کو باضابطہ خط ارسال کر دیا ہے۔

نیب کراچی نے سندھ پبلک سروس کمیشن کے کمبائنڈ کمیپٹیٹو ایگزامینیشن (CCE) 2023 میں سامنے آنے والی مبینہ بدعنوانی کی شکایت پر نوٹس لیتے ہوئے تمام امیدواروں کی مکمل تفصیلات اور نتائج کا ریکارڈ طلب کر لیا ہے۔ نیب کے جاری کردہ مراسلے میں ہدایت کی گئی ہے کہ اسکریننگ ٹیسٹ اور تحریری امتحان پاس کرنے والے تمام کامیاب و ناکام امیدواروں کی الگ الگ تفصیلی فہرستیں اور ریکارڈ جمع کرایا جائے۔

علاوہ ازیں، نیب کراچی نے متعلقہ امتحانات کے اصل اشتہار، بھرتی ہونے والے امیدواروں کی جوائننگ کی رپورٹس، اور انٹرویو پینل میں شامل تمام ارکان کی مکمل تفصیلات بھی فراہم کرنے کی سخت ہدایت کی ہے۔ نیب حکام نے سیکرٹری سندھ پبلک سروس کمیشن کو پابند کیا ہے کہ گریڈ 18 کا متعلقہ ذمہ دار افسر تمام طلب کردہ ریکارڈ اور دستاویزات کے ساتھ 20 اکتوبر کو نیب کراچی کے دفتر میں ذاتی حیثیت میں پیش ہو۔