دنیا میں جو تیل مہنگا ہو گا اس کے اثرات تو پاکستان تک پہنچے ہی نہیں،سید نوید قمر

اسلام آباد: قومی اسمبلی کے اجلاس میں پیٹرولیم مصنوعات کی قیمتوں میں اضافے پر اپوزیشن نے شدید ردعمل دیا۔ رکن قومی اسمبلی سید نوید قمر نے خطاب کرتے ہوئے کہا کہ ایران میں بمباری اور آبنائے ہرمز میں نقل و حرکت تقریباً بند ہونے کے باعث خطے میں تیل کی سپلائی محدود ہو گئی ہے، جس کے نتیجے میں عالمی منڈی میں تیل کی قیمتوں میں اضافہ ہوا ہے۔

انہوں نے کہا کہ پاکستان آئی ایم ایف پروگرام میں شامل ہے، لیکن حکومت نے پیٹرول کی قیمت میں 55 روپے فی لیٹر اضافہ کر دیا، جس سے اربوں روپے کا فائدہ کسی کو پہنچایا جا رہا ہے۔ نوید قمر نے سوال اٹھایا کہ یہ اضافہ آئی ایم ایف کی ہدایت پر نہیں کیا گیا، لہٰذا حکومت واضح کرے کہ اس اقدام سے کس کو فائدہ پہنچایا جا رہا ہے۔

انہوں نے حکومت سے مطالبہ کیا کہ عوام پر بوجھ ڈالنے کے بجائے پیٹرولیم قیمتوں میں اضافے کا فیصلہ واپس لیا جائے۔

نوید قمر کی تقریر کے بعد اپوزیشن ارکان نے بھی پیٹرولیم مصنوعات کی قیمتوں میں اضافے پر بات کرنے کے لیے فلور مانگا، تاہم اجازت نہ ملنے پر ایوان میں شور شرابہ شروع ہو گیا۔ بعد ازاں قومی اسمبلی کا اجلاس 10 مارچ بروز منگل دن 12 بجے تک ملتوی کر دیا گیا۔