بہاولپور: این اے 168 ضمنی انتخاب کیلئے پولنگ جاری، 20 امیدوار میدان میں

قومی اسمبلی کے حلقہ این اے 168 بہاولپور-5 میں ضمنی انتخاب کے لیے پولنگ کا عمل جاری ہے، جہاں 20 امیدواروں کے درمیان سیاسی معرکہ برپا ہے。 الیکشن کمیشن آف پاکستان کے مطابق پولنگ کا آغاز صبح 8 بجے ہوا جو بغیر کسی وقفے کے شام 5 بجے تک جاری رہے گا۔ حلقے میں مجموعی طور پر 4 لاکھ 83 ہزار 143 ووٹرز رجسٹرڈ ہیں، جن میں 2 لاکھ 48 ہزار 529 مرد اور 2 لاکھ 34 ہزار 614 خواتین ووٹرز شامل ہیں۔ ووٹرز کی سہولت کے لیے 292 پولنگ اسٹیشنز اور 896 پولنگ بوتھ قائم کیے گئے ہیں، جن میں 130 مرد، 130 خواتین اور 32 مشترکہ پولنگ اسٹیشنز شامل ہیں۔

سیکیورٹی کو فول پروف بنانے کے لیے 3 ہزار سے زائد پولیس اہلکار ڈیوٹی انجام دے رہے ہیں، جبکہ امن و امان کی صورتِ حال کو قابو میں رکھنے کے لیے پاک فوج اور پنجاب رینجرز کی ایک ایک کمپنی کو ریزرو کے طور پر الرٹ رکھا گیا ہے۔ یہ نشست مسلم لیگ (ن) کے رکنِ قومی اسمبلی ملک محمد اقبال چنڑ کے انتقال کے باعث خالی ہوئی تھی۔ اس ضمنی معرکے میں مسلم لیگ (ن) کے ٹکٹ پر مرحوم کے بیٹے ملک منیر اقبال چنڑ اور سابق وفاقی وزیر چودھری طارق بشیر چیمہ کے بیٹے ولی داد چیمہ بطور آزاد امیدوار آمنے سامنے ہیں، جس کے باعث حلقے میں کڑا مقابلہ توقع کیا جا رہا ہے۔