این اے 130: نواز شریف کی کامیابی درست قرار، یاسمین راشد کی درخواست خارج

الیکشن کمیشن نے قومی اسمبلی کے حلقہ این اے 130 سے نواز شریف کی کامیابی کا نوٹیفکیشن درست قرار دیتے ہوئے ڈاکٹر یاسمین راشد کی درخواست خارج کر دی ہے۔

ذرائع کے مطابق ڈاکٹر یاسمین راشد نے نواز شریف کی کامیابی کو چیلنج کیا تھا، جس پر الیکشن ٹریبونل کے جج رانا زاہد محمود نے فیصلہ سنایا۔ فیصلے میں درخواست کو تکنیکی بنیادوں پر مسترد کرتے ہوئے این اے 130 سے نواز شریف کی کامیابی کے نوٹیفکیشن کو برقرار رکھا گیا۔

واضح رہے کہ گزشتہ برس فروری میں ہونے والے عام انتخابات میں لاہور کے حلقہ این اے 130 سے نواز شریف نے 1 لاکھ 71 ہزار 24 ووٹ حاصل کر کے کامیابی حاصل کی تھی، جبکہ آزاد امیدوار ڈاکٹر یاسمین راشد نے 1 لاکھ 15 ہزار 43 ووٹ حاصل کیے تھے۔ بعد ازاں ڈاکٹر یاسمین راشد نے انتخابی نتائج کو چیلنج کیا تھا، جسے الیکشن ٹریبونل نے مسترد کر دیا۔