وزیراعظم اور صدر کی اہم ملاقات، ن لیگ اور پیپلز پارٹی میں بجٹ تجاویز پر اتفاق

وزیراعظم شہباز شریف کی ایوان صدر آمد کے موقع پر مسلم لیگ (ن) اور پاکستان پیپلز پارٹی کی قیادت کے درمیان اہم ملاقات ہوئی جس میں بجٹ تجاویز اور دیگر قومی امور پر تفصیلی بات چیت کی گئی۔

ایوان صدر میں ہونے والے اجلاس کی صدارت صدر مملکت آصف علی زرداری نے کی، جس میں دونوں جماعتوں کی اعلیٰ قیادت شریک ہوئی۔

ذرائع کے مطابق ملاقات میں وفاقی بجٹ سے متعلق مختلف تجاویز پر اتفاق کیا گیا جبکہ پیپلز پارٹی کی جانب سے پیش کی گئی سفارشات کو حکومت نے منظور کرنے پر آمادگی ظاہر کی۔

اجلاس میں آزاد کشمیر کی صورتحال پر بھی غور کیا گیا، جہاں فریقین نے اس بات پر اتفاق کیا کہ معاملات کو سیاسی مذاکرات کے ذریعے حل کیا جائے گا۔

ذرائع کے مطابق پیپلز پارٹی کی قیادت نے وزیراعظم کو بجٹ تجاویز پر عملدرآمد سے متعلق اپنے تحفظات سے آگاہ کیا، تاہم آئندہ دنوں میں ان سفارشات کی منظوری کا امکان ظاہر کیا جا رہا ہے۔