مجلس وحدت مسلمین کا امریکی سفارتخانہ بندکرنے، غزہ بورڈ سے نکلنے کا مطالبہ

مجلس وحدت مسلمین پاکستان نے امریکی سفارتخانہ اورقونصل خانے بند اورپاکستان کے غزہ بورڈ آف پیس سے فوری نکلنے کا مطالبہ کیاہے۔ترجمان مجلس وحدت المسلمین نے ایران پر حملے اورآیت اللہ خامنہ ای کی شہادت کےخلاف احتجاج کے دوران مختلف شہروں میں مظاہرین کے جاں بحق ہونے کی مذمت کی اورپیر کو سرکاری سطح پر یوم سوگ کے اعلان کامطالبہ کیا۔۔

ترجمان نے دعویٰ کیاکہ پرامن احتجاج کرنے والوں  کو امریکی سفارتخانے و قونصل خانے اورسیکیورٹی کے اہلکاروں نے گولیوں کا نشانہ بنایا۔جس کے نتیجے میں 36مظاہرین شہید اور 205زخمی ہوئے جبکہ سیکڑوں مظاہرین کو گرفتارکرلیاگیا۔

ترجمان کاموقف تھاکہ کراچی کے علاوہ گلگت، اسکردو، اسلام آباد اورلاہورسمیت دیگرشہروں میں امریکاواسرائیل کےخلاف احتجاجی ریلیوں کے دوران مظاہرین کوتشدد کانشانہ بنایاگیاجو قابل مذمت ہے۔ ان واقعات میں زخمی ہونے والے سیکڑوں افرادمیں خواتین بھی شامل ہیں۔

مجلس وحدت مسلمین کے مطابق ملت جعفریہ میں شامل تمام تنظیمیں، اکابرین اورعلماکرام اس فعل کی شدید مذمت کرتے ہوئےمطالبہ کرتے ہیں کہ امریکی سفارتخانے اور قونصل خانوں کو بند کرکے سفارتی عملے کو ملک بدر کیا جائے۔اس کے علاوہ سیکٹروں گرفتار عمائدین کو فوری رہاکیاجائے۔اوران تمام واقعات کی غیرجانبدارانہ تحقیقات کرائی جائیں۔