پاکستان دنیا کا پانچواں بڑا آبادی والا ملک، 2050 تک آبادی 40 کروڑ تک پہنچنے کا خدشہ

پاکستان آبادی کے لحاظ سے دنیا کا پانچواں بڑا ملک بن چکا ہے، اور ماہرین نے خبردار کیا ہے کہ اگر اضافے کی موجودہ رفتار برقرار رہی تو 2050 تک ملک کی آبادی 40 کروڑ تک پہنچ جائے گی۔ ملک میں آبادی کی سالانہ شرح نمو 2.5 فیصد اور ایک خاتون کے اوسط بچوں کی تعداد 3.6 ہے، جس سے بنیادی سہولتوں پر دباؤ بڑھ رہا ہے۔ وفاقی وزیر صحت مصطفیٰ کمال نے اسلام آباد میں پریس کانفرنس کرتے ہوئے کہا کہ آبادی میں اضافے کی شرح کو 1.2 فیصد اور شرح پیدائش کو 2 سے کم پر لانا ناگزیر ہے، کیونکہ ہر سال 11 ہزار مائیں دورانِ زچگی جان کی بازی ہار جاتی ہیں۔ انہوں نے اعلان کیا کہ مانع حمل ادویات پر عائد ٹیکس ختم کر دیا گیا ہے تاکہ یہ عوام کو سستے داموں مل سکیں۔ وفاقی وزیر نے این ایف سی (NFC) ایوارڈ کے فارمولے پر بھی سوال اٹھاتے ہوئے کہا کہ فنڈز کی 82 فیصد تقسیم آبادی کی بنیاد پر ہوتی ہے، تو کوئی بھی صوبہ اپنی آبادی کم کر کے اپنے پیسے کیوں کم کرے گا؟

رپورٹ کے مطابق ملک کی نصف آبادی طبی سہولتوں سے محروم، 16 فیصد غذائی قلت کا شکار اور ڈھائی کروڑ بچے اسکولوں سے باہر ہیں۔ ماہرین کے مطابق 2050 تک بڑھتی آبادی کی ضروریات پوری کرنے کے لیے مزید 66 ہزار نئے اسکولوں، 6 لاکھ 79 ہزار اساتذہ، ساڑھے 6 کروڑ ملازمتوں اور 2 لاکھ سے زائد اضافی لیڈی ہیلتھ ورکرز کی ضرورت ہو گی۔