پاکستان قبائل موومنٹ کی نئے انتظامی یونٹس بارے ایم کیو ایم کے مؤقف کی حمایت

وفاقی وزیرِ صحت مصطفیٰ کمال سے پاکستان قبائل موومنٹ کے صوبائی عہدیداروں نے ایک اہم ملاقات کی، جس کے دوران وفاقی وزیر نے ملک کے موجودہ سیاسی و انتظامی نظام کے حقائق اور درپیش چیلنجز پر تفصیلی گفتگو کی۔ اس موقع پر مصطفیٰ کمال نے ملک میں نئے انتظامی یونٹس اور صوبوں کے قیام کے حق میں ٹھوس دلائل پیش کرتے ہوئے کہا کہ موجودہ گgovernance اور انتظامی ڈھانچے کے تحت پاکستان کو مزید نہیں چلایا جا سکتا۔ انہوں نے کہا کہ نئے انتظامی یونٹس کا قیام سیاسی یا لسانی نہیں بلکہ انتظامی ضرورت ہے جو ہر لحاظ سے پاکستان کی ترقی اور استحکام کے حق میں ہے۔

وفاقی وزیر صحت نے گفتگو کرتے ہوئے مزید کہا کہ اٹھارہویں آئینی ترمیم کے بعد طاقت اور اختیارات کی منتقلی نچلی سطح تک نہیں ہو سکی، جس کے نتیجے میں پاکستان میں چاروں صوبے عملی طور پر چار آزاد ممالک کی شکل اختیار کر چکے ہیں۔ ملاقات کے دوران پاکستان قبائل موومنٹ نے نئے انتظامی یونٹس کی تشکیل سے متعلق ایم کیو ایم پاکستان کے موقف اور مطالبے کی مکمل اور غیر مشروط حمایت کا اعلان کیا۔ پاکستان قبائل موومنٹ کے صدر نے یقین دہانی کرائی کہ ایم کیو ایم پاکستان نئے انتظامی یونٹس کے قیام کے لیے جس دن بھی کال دے گی، کراچی کے تمام پشتون ان کے شانہ بشانہ کھڑے ہوں گے۔