سڈنی بیچ حملہ ، مسلح شخص کو قابو کرنے والے مسلم ہیرو احمد ال احمد کی عالمی سطح پر پذیرائی

آسٹریلیا کے شہر سڈنی کے مصروف ساحل بونڈی بیچ پر یہودیوں کے مذہبی تہوار حنوکا کے دوران ہونے والے مسلح حملے کو ایک مسلمان شہری نے جان پر کھیل کر ناکام بنا دیا، جس پر دنیا بھر میں اس کی جرات و بہادری کو سراہا جا رہا ہے۔

بین الاقوامی میڈیا رپورٹس کے مطابق ویک اینڈ اور مذہبی تقریب کے باعث ساحل پر لوگوں کی بڑی تعداد موجود تھی کہ اسی دوران دو مسلح افراد ایک بلند مقام سے اندھا دھند فائرنگ کرنے لگے، جس کے نتیجے میں 12 افراد ہلاک اور 37 زخمی ہو گئے۔ فائرنگ شروع ہوتے ہی ساحل پر بھگدڑ مچ گئی اور لوگ جان بچانے کے لیے ادھر ادھر دوڑنے لگے۔

اسی ہنگامے میں ایک شخص نے غیر معمولی حوصلے کا مظاہرہ کرتے ہوئے ایک گاڑی کی آڑ لی، پھر آگے بڑھ کر مسلح حملہ آور کو دبوچ لیا اور اسے قابو میں کر کے مزید بڑے جانی نقصان سے بچا لیا۔

آسٹریلوی میڈیا کے مطابق حملہ آور کو قابو کرنے والا بہادر شہری 43 سالہ احمد ال احمد ہے، جو آسٹریلیا کا شہری ہے اور ساحل کے قریب پھل فروخت کرتا ہے۔ احمد ال احمد کے دو بچے ہیں اور وہ واقعے کے وقت بھی معمول کے مطابق اپنے کام پر موجود تھے۔

حملہ آور کو قابو کرنے کے دوران احمد ال احمد کو دو گولیاں لگیں، جس کے بعد انہیں فوری طور پر اسپتال منتقل کیا گیا۔ ڈاکٹروں کے مطابق گولیاں بازو پر لگیں اور ان کی حالت خطرے سے باہر ہے۔

واقعے کے بعد دنیا بھر میں احمد ال احمد کو مسلم ہیرو قرار دیتے ہوئے اس کے جرات مندانہ اقدام کی بھرپور پذیرائی کی جا رہی ہے، جبکہ سوشل میڈیا پر بھی انہیں خراجِ تحسین پیش کیا جا رہا ہے۔