دنیا کے بڑے جہازوں میں شمار جہاز کراچی پورٹ پر لنگر انداز

پاکستان کی بحری تجارت اور بندرگاہی صلاحیتوں میں ایک اور تاریخی سنگِ میل عبور کر لیا گیا ہے۔ دنیا کے سب سے بڑے کنٹینر بردار بحری جہازوں میں شمار ہونے والا عظیم الجثہ بحری جہاز “ایم ایس سی لوریٹو” (MSC Loreto) کراچی کی بندرگاہ پر واقع گہرے پانی کے ٹرمینل (SAPTL) پر کامیابی سے لنگر انداز ہو گیا ہے۔ کراچی پورٹ ٹرسٹ (KPT) نے اس الٹرا لارج جہاز کا شاندار استقبال کیا۔

ترجمان کے پی ٹی کے مطابق یہ بحری جہاز اپنی نوعیت کا ایک بہت بڑا کنٹینر کیریئر ہے۔ اس جہاز کی کل لمبائی 399.9 میٹر ہے۔ اس میں 24 ہزار 346 ٹی ای یوز (TEUs) کنٹینرز لوڈ کرنے کی گنجائش ہے۔  یہ جہاز 3 ہزار 802 ٹی ای یوز لے کر کراچی بندرگاہ پہنچا ہے۔ کے پی ٹی کے ترجمان کا کہنا ہے کہ اتنے بڑے الٹرا لارج جہاز کی آمد اس بات کا واضح ثبوت ہے کہ کراچی پورٹ اب دنیا کے بڑے ترین کنٹینر جہازوں کو مؤثر، محفوظ اور جدید ترین انداز میں ہینڈل کرنے کی مکمل صلاحیت رکھتا ہے۔ یہ کامیابی بندرگاہ پر جاری انفراسٹرکچر کی بہتری، جدید ٹرمینل سہولیات اور آپریشنل استعداد میں مسلسل اضافے کا نتیجہ ہے۔ ماہرین کے مطابق دنیا کے اتنے بڑے بحری جہاز کی کراچی آمد سے پاکستان کی عالمی میری ٹائم نیٹ ورک میں پوزیشن مزید مضبوط ہوگی۔ یہ پیش رفت نہ صرف ملک کی بحری تجارت کو فروغ دے گی بلکہ بین الاقوامی تجارتی برادری کا پاکستان کی بندرگاہوں پر اعتماد بھی بڑھائے گی۔