پیپلز پارٹی کی کرپشن اور ناقص حکمرانی اب نہیں چھپ سکتی، ایم کیو ایم کا سخت ردعمل

ایم کیو ایم پاکستان نے پیپلز پارٹی پر سخت تنقید کرتے ہوئے کہا ہے کہ سندھ میں بدترین طرز حکمرانی، بدعنوانی اور انتظامی ناکامیوں کو محض بیانات اور پریس کانفرنسوں کے ذریعے چھپایا نہیں جا سکتا۔

ترجمان ایم کیو ایم نے اپنے بیان میں کہا کہ پیپلز پارٹی کی کارکردگی اور کرپشن کے حوالے سے عوامی سطح پر شدید تحفظات پائے جاتے ہیں اور اب صورتحال اس نہج پر پہنچ چکی ہے کہ حقائق کو چرب زبانی کے ذریعے تبدیل نہیں کیا جا سکتا۔

انہوں نے کہا کہ پیپلز پارٹی کے رہنما یہ بات ذہن نشین کرلیں کہ معاملات اب صرف پریس کانفرنسوں تک محدود نہیں رہے بلکہ عوام خود حکومتی کارکردگی پر سوالات اٹھا رہے ہیں۔

ترجمان نے کہا کہ کراچی سمیت سندھ بھر میں عوام بنیادی سہولتوں کی کمی، بدانتظامی اور مختلف مسائل کا سامنا کر رہے ہیں، جس کے باعث حکمران جماعت کی کارکردگی تنقید کی زد میں ہے۔

ایم کیو ایم کے ترجمان کا کہنا تھا کہ پیپلز پارٹی کی حکمرانی، پالیسیوں اور انتظامی فیصلوں پر عوامی سطح پر سوالات اٹھ رہے ہیں اور موجودہ حالات میں حکومت کو جوابدہی کا سامنا کرنا ہوگا۔

انہوں نے مزید کہا کہ سندھ کے عوام اپنے مسائل کے حل اور شفاف طرز حکمرانی کے منتظر ہیں اور سیاسی بیانات کے بجائے عملی اقدامات کی ضرورت ہے۔