دھند کے باعث موٹرویز ایم 4، ایم 5 اور ایم 3 بند، موٹروے پولیس کی شہریوں کو احتیاطی ہدایات

 موٹروے پولیس کے ترجمان سید عمران احمد کے مطابق شدید دھند کے باعث مختلف موٹرویز کو ٹریفک کے لیے بند کر دیا گیا ہے۔ موٹروے ایم 4 فیصل آباد سے ملتان تک جبکہ موٹروے ایم 5 ملتان سے ظاہر پیر تک دھند کے باعث بند ہے۔ اسی طرح موٹروے ایم 3 کو جڑانوالہ سے درخانہ تک بند کر دیا گیا ہے۔

ترجمان موٹروے پولیس نے بتایا کہ موٹرویز کی بندش کا مقصد عوام کی جان و مال کا تحفظ یقینی بنانا ہے، کیونکہ دھند کے دوران لین کی خلاف ورزی خطرناک حادثات کا سبب بن سکتی ہے۔ انہوں نے کہا کہ روڈ یوزرز لین ڈسپلن پر سختی سے عمل کریں اور غیر ضروری سفر سے اجتناب کریں۔

موٹروے پولیس کے مطابق شہری دن کے اوقات میں سفر کو ترجیح دیں، جبکہ دھند کے دوران صبح 10 بجے سے شام 6 بجے تک کے اوقات نسبتاً محفوظ سمجھے جاتے ہیں۔ ترجمان نے ڈرائیور حضرات کو ہدایت کی کہ فوگ لائٹس کا لازمی استعمال کریں، تیز رفتاری سے گریز کریں اور آگے چلنے والی گاڑی سے محفوظ فاصلہ رکھیں۔

موٹروے پولیس نے مزید کہا کہ کسی بھی رہنمائی یا مدد کے لیے شہری موٹروے پولیس کی ہیلپ لائن 130 پر رابطہ کر سکتے ہیں۔