موٹروے پولیس نے پیسوں سے بھرا گمشدہ بیگ مالک کے حوالے کر دیا

موٹروے پولیس سنٹرل ریجن نے ایم 3 موٹروے پر شہری کا گم ہو جانے والا قیمتی بیگ بحفاظت برآمد کر کے، ضروری تصدیق کے بعد اصل مالک کے حوالے کر دیا ہے۔

ترجمان موٹروے پولیس کے مطابق لاہور سے ملتان سفر کرنے والے ایک شہری کا قیمتی سامان سے بھرا بیگ بچیکی سروس ایریا میں غلطی سے رہ گیا تھا۔ شہری کی جانب سے اطلاع ملتے ہی موٹروے پولیس کے اہلکاروں نے فوری اور بروقت کارروائی کرتے ہوئے سروس ایریا سے بیگ تلاش کیا اور اسے اپنی تحویل میں لے لیا۔

ترجمان نے مزید بتایا کہ برآمد کیے گئے بیگ میں ایک آئی فون، 1,200 امریکی ڈالر، 50 ہزار روپے نقد رقم، مختلف بینکوں کے اے ٹی ایم کارڈز اور قومی شناختی کارڈ سمیت دیگر اہم اور قیمتی اشیاء موجود تھیں، جن کی کل مالیت تقریباً 10 لاکھ روپے بنتی ہے۔ تمام سامان کی مکمل چھان بین اور شہری کی شناخت کی تصدیق کے بعد بیگ اور اس میں موجود تمام اشیاء بحفاظت مالک کے سپرد کر دی گئیں۔ شہری نے موٹروے پولیس کی ایمانداری اور بروقت اقدام پر ان کا شکریہ ادا کیا۔