دھند کے باعث سنٹرل ریجن میں موٹرویز بند، شہریوں کو غیر ضروری سفر سے گریز کی ہدایت

شدید دھند کے باعث سنٹرل ریجن میں ٹریفک کی روانی متاثر ہو گئی ہے، موٹروے پولیس کے مطابق لاہور ایسٹرن بائی پاس اور موٹروے ایم-3 فیض پور سے جڑانوالہ تک دھند کی وجہ سے بند کر دیا گیا ہے۔

 ترجمان سنٹرل ریجن سید عمران احمد کا کہنا ہے کہ موٹرویز کی بندش کا مقصد عوام کی جان و مال کا تحفظ ہے کیونکہ دھند میں لین کی خلاف ورزی اور تیز رفتاری خطرناک حادثات کا باعث بن سکتی ہے، موٹروے پولیس نے شہریوں کو ہدایت کی ہے کہ غیر ضروری سفر سے گریز کریں، دن کے اوقات میں سفر کو ترجیح دیں۔

دھند کے دوران صبح 10 بجے سے شام 6 بجے تک کو محفوظ سفری اوقات سمجھا جاتا ہے، ڈرائیور حضرات فوگ لائٹس کا استعمال یقینی بنائیں، لین ڈسپلن پر سختی سے عمل کریں اور آگے چلنے والی گاڑی سے محفوظ فاصلہ برقرار رکھیں، جبکہ کسی بھی رہنمائی یا مدد کے لیے موٹروے پولیس ہیلپ لائن 130 پر رابطہ کیا جا سکتا ہے۔