محسن نقوی کا ترقیاتی منصوبوں کا دورہ، 31 دسمبر تک مکمل کرنے کی ہدایت

وفاقی وزیر داخلہ محسن نقوی اور وزیر مملکت طلال چوہدری نے مارگلہ روڈ کی موٹروے تک توسیع اور سنگجانی انٹرچینج کے ترقیاتی منصوبوں کا دورہ کر کے جاری کاموں کا تفصیلی جائزہ لیا ہے۔ اس موقع پر وزیر داخلہ نے متعلقہ حکام کو ہدایت کی کہ منصوبوں پر ڈبل شفٹ میں کام جاری رکھ کر رفتار کو مزید تیز کیا جائے تاکہ یہ ہر صورت 31 دسمبر تک مکمل ہو سکیں۔ محسن نقوی نے واضح کیا کہ اس منصوبے سے اسلام آباد کے شہریوں کو موٹروے تک آمدورفت کا متبادل اور بہتر راستہ میسر آئے گا۔ انہوں نے ڈپٹی کمشنر کو ایک ہفتے کے اندر تمام تجاوزات کا خاتمہ کرنے اور تعمیراتی کام میں حائل تمام رکاوٹیں فوری طور پر دور کرنے کے احکامات بھی جاری کیے۔ سی ڈی اے حکام نے بریفنگ میں بتایا کہ 2.7 کلومیٹر طویل اس منصوبے میں ایک انڈر پاس اور ایک انٹرچینج بھی شامل ہے۔