محسن نقوی کا بیجنگ پاسپورٹ بیورو کا دورہ، جدید امیگریشن نظام کی تعریف

وفاقی وزیر داخلہ محسن نقوی نے بیجنگ میں پبلک سکیورٹی کے پاسپورٹ و ایگزٹ انٹری ایڈمنسٹریشن بیورو کا دورہ کیا۔ بیورو کے ڈائریکٹر جنرل سن یو نے وزیر داخلہ کا پرتپاک استقبال کیا اور انہیں ادارے کے مختلف سیکشنز کا دورہ کرایا۔

وزیر داخلہ نے چین کے پاسپورٹ بنانے اور امیگریشن نظام کا تفصیلی جائزہ لیا، جبکہ انہیں پاسپورٹ کی درخواست سے لے کر پرنٹنگ تک کے تمام مراحل، غیر ملکیوں کی آمد، قیام اور واپسی کے نظام پر بریفنگ دی گئی۔ محسن نقوی کو “ون ونڈو” سہولت کے تحت پاسپورٹ اور امیگریشن کے تیز رفتار اور مؤثر پراسیس سے بھی آگاہ کیا گیا۔

وفاقی وزیر داخلہ نے ایگزٹ انٹری ایڈمنسٹریشن بیورو کے برق رفتار اور جدید نظام کو سراہتے ہوئے کہا کہ چینی انٹری ایگزٹ سسٹم کی افادیت، مؤثریت اور رفتار قابلِ تعریف ہے۔ انہوں نے کہا کہ پاکستان میں بھی پاسپورٹ اور امیگریشن نظام کو تیز رفتار اور فول پروف بنایا جا رہا ہے، جبکہ جعلسازی کے خاتمے کیلئے پاسپورٹس میں جدید سکیورٹی فیچرز متعارف کرائے جائیں گے۔

محسن نقوی نے بتایا کہ پاکستان میں جدید انٹری ایگزٹ کنٹرول سسٹم کو بھی بیجنگ ماڈل کی طرز پر جدید خطوط پر استوار کیا جا رہا ہے۔

بریفنگ میں بتایا گیا کہ چین میں آن لائن درخواست کے بعد پاسپورٹ 24 گھنٹوں کے اندر شہری کو فراہم کر دیا جاتا ہے، جبکہ شہریوں کی سہولت کیلئے بیورو ہفتے کے ساتوں دن 24 گھنٹے کھلا رہتا ہے۔ ملٹی لینگویج رہنمائی، ڈیجیٹل ٹریکنگ اور ریئل ٹائم اپڈیٹس کے ذریعے درخواست گزاروں کو بروقت آگاہی فراہم کی جاتی ہے۔

اس موقع پر وفاقی سیکرٹری داخلہ خرم آغا، ڈی جی نیشنل پولیس اکیڈمی محمد ادریس، ڈی جی نیشنل سائبر کرائمز انویسٹی گیشن ایجنسی سید خرم علی، آئی جی اسلام آباد پولیس علی ناصر رضوی اور چیف کمشنر اسلام آباد محمد علی رندھاوا بھی موجود تھے۔