کارگل کے پہاڑ کیپٹن کرنل شیر خان شہید کی بہادری کے گواہ ہیں، محسن نقوی

وفاقی وزیر داخلہ محسن نقوی نے نشانِ حیدر پانے والے قومی ہیرو کیپٹن کرنل شیر خان شہید کے یومِ شہادت پر انہیں شاندار الفاظ میں خراجِ عقیدت پیش کرتے ہوئے کہا ہے کہ کارگل کے فلک بوس پہاڑ کیپٹن کرنل شیر خان شہید کی لازوال بہادری کے گواہ ہیں۔

اپنے ایک تہنیتی پیغام میں وفاقی وزیر داخلہ نے کہا کہ قوم کے اس عظیم اور بہادر بیٹے کو پوری قوم کا سلام ہے۔ کیپٹن کرنل شیر خان شہید نے معرکہ کارگل میں اپنی جرات اور شجاعت سے دشمن کی صفوں میں لرزہ طاری کر دیا اور دلیری سے لڑتے ہوئے دشمن کے ناپاک عزائم کو خاک میں ملا دیا۔

محسن نقوی نے مزید کہا کہ دشمن کا بھرپور مقابلہ کرنے والا قوم کا یہ دلیر سپاہی آج بھی ہر پاکستانی کے دل میں زندہ ہے۔ انہوں نے اس عزم کا اظہار کیا کہ کیپٹن کرنل شیر خان شہید جیسے بہادر جوانوں کی موجودگی میں کوئی بھی دشمن وطنِ عزیز کی طرف میلی آنکھ سے دیکھنے کی جرات نہیں کر سکتا۔ شہید نے اپنی قربانی سے جوانمردی اور شجاعت کی ایک نئی تاریخ رقم کی ہے جس پر پوری قوم کو فخر ہے۔