سیاسی اختلاف اپنی جگہ، ریاست مخالف باتیں کسی سیاستدان کو زیب نہیں دیتیں: محسن نقوی

وفاقی وزیر داخلہ محسن نقوی نے سینیٹ اجلاس میں اظہارِ خیال کرتے ہوئے جے یو آئی (ف) کے سربراہ مولانا فضل الرحمان کے ریاستی اداروں سے متعلق حالیہ بیان پر شدید ردِعمل کا اظہار کیا ہے۔ محسن نقوی نے کہا کہ وہ ماضی میں مولانا کا احترام کرتے تھے مگر اداروں پر تنقید کے بعد اب اس کی کوئی گنجائش نہیں رہی۔ انہوں نے موقف اختیار کیا کہ فائدے ملنے پر ریاست اچھی لگے اور حکومت نہ ملنے پر تنقید کی جائے، ایسا رویہ کسی سیاستدان کو زیب نہیں دیتا۔ وزیر داخلہ نے دورۂ ایران پر وضاحت دیتے ہوئے مولانا فضل الرحمان کے دفاعی معاہدے سے متعلق دعوے کو رد کیا اور بتایا کہ وہ وزیراعظم کے دیے گئے خصوصی ٹاسک پر ایران گئے تھے نہ کہ کسی دفاعی معاہدے کے لیے۔