محسن نقوی کی ایرانی صدر سے ملاقات، مشترکہ تعاون کو مزید وسعت دینے عزم

وفاقی وزیرِ داخلہ محسن نقوی نے ایران کا اہم سرکاری دورہ کیا ہے، جس کے دوران انہوں نے تہران میں ایرانی صدر مسعود پزشکیان اور اپنے ایرانی ہم منصب سکندر مومنی سے اعلیٰ سطح کی ملاقاتیں کیں۔ ملاقاتوں کے دوران پاک ایران دوطرفہ تعلقات، خطے کی موجودہ سیکیورٹی صورتِ حال اور پیدا شدہ چیلنجز پر تفصیلی تبادلۂ خیال کیا گیا۔

ایرانی صدر مسعود پزشکیان نے وزیرِ داخلہ محسن نقوی سے گفتگو کرتے ہوئے کہا کہ امریکی دباؤ اور عائد کردہ پابندیوں کے نتیجے میں مسلم ممالک ایک دوسرے کے زیادہ قریب آئے ہیں۔ انہوں نے زور دیا کہ ایران اور پاکستان اپنے علاقائی وسائل اور صلاحیتوں سے بھرپور فائدہ اٹھاتے ہوئے اپنی متعدد ضروریات کو خود باہمی تعاون سے پورا کر سکتے ہیں۔ صدر پزشکیان کا کہنا تھا کہ پاکستان دونوں ممالک کے درمیان تجارت، معیشت، سیاست، ثقافت اور سائنس و ٹیکنالوجی سمیت تمام شعبوں میں مشترکہ تعاون کو مزید وسعت دینے کے لیے مکمل طور پر پرعزم ہے۔

اس سے قبل، ایرانی وزارتِ داخلہ آمد پر وفاقی وزیرِ داخلہ محسن نقوی کا گرمجوشی سے استقبال کیا گیا، جہاں انہوں نے اپنے ایرانی ہم منصب سکندر مومنی سے ملاقات کی اور مختلف شعبوں میں جاری دوطرفہ پیش رفت کا تفصیلی جائزہ لیا۔ ایرانی وزیرِ داخلہ سکندر مومنی نے علاقائی امن و استحکام اور کشیدگی میں کمی کے لیے پاکستان کی مسلسل سفارتی کاوشوں پر شکریہ ادا کیا اور اپنا حالیہ دورۂ پاکستان انتہائی مفید قرار دیا۔ اس موقع پر محسن نقوی نے عزم ظاہر کیا کہ آنے والے وقت میں دونوں برادر اسلامی ممالک کے تعلقات مزید مضبوط اور مستحکم ہوں گے۔