سری لنکن صدر کا پاکستانیوں کے لیے ویزا مشکلات فوری ختم کرنے کا حکم

وفاقی وزیر داخلہ محسن نقوی نے سری لنکا کے صدر انورا کمارا ڈسانائیکے سے اہم ملاقات کی جس میں دوطرفہ تعلقات اور سیکیورٹی تعاون پر تبادلہ خیال کیا گیا۔

ملاقات کے دوران محسن نقوی نے پاکستانی شہریوں کو درپیش ویزا مشکلات کے بارے میں آگاہ کیا، جس پر سری لنکن صدر نے فوری نوٹس لیتے ہوئے پاکستان کو تمام متعلقہ لسٹوں سے نکالنے کی ہدایت جاری کی۔ اس موقع پر وفاقی وزیر اوورسیز پاکستانیز چودھری سالک حسین بھی موجود تھے۔

سری لنکن صدر نے کہا کہ وہ سری لنکا کی وزیراعظم کو جلد پاکستان کے دورے پر بھیجیں گے تاکہ دوطرفہ روابط کو مزید فروغ دیا جا سکے۔

ملاقات میں انسداد دہشت گردی، انسداد منشیات اور دونوں ممالک کی فورسز کی مشترکہ ٹریننگ کے امور پر تفصیلی گفتگو ہوئی۔ محسن نقوی نے پاک۔سری لنکا تعلقات کے فروغ میں سری لنکن صدر کے کردار کو سراہا۔

وزیر داخلہ نے وزیراعظم شہباز شریف کی جانب سے سری لنکن صدر کو پاکستان کے سرکاری دورے کی دعوت بھی دی۔

دوران ملاقات محسن نقوی نے ٹی 20 ورلڈ کپ کے موقع پر شاندار انتظامات اور پاکستانی وفد کی میزبانی پر سری لنکن قیادت کا شکریہ ادا کیا۔

سری لنکن صدر نے پاکستان کے ساتھ تعلقات کو مزید مستحکم بنانے کے عزم کا اعادہ کرتے ہوئے کولمبو میں بھارت کے ساتھ ٹی 20 میچ کھیلنے پر وزیراعظم شہباز شریف کا خصوصی شکریہ ادا کیا اور پاکستان کے خیر سگالی جذبے کو سراہا۔