چیئرمین پی سی بی کے اعزاز میں سری لنکن کرکٹ بورڈ کی خصوصی تقریب

کولمبو: چیئرمین پی سی بی محسن نقوی کے اعزاز میں سری لنکا کرکٹ نے خصوصی تقریب کا اہتمام کیا۔

تقریب میں محسن نقوی کی کھیل کے فروغ کے لیے گراں قدر خدمات کو سراہتے ہوئے انہیں خراج تحسین پیش کیا گیا۔ اس موقع پر سری لنکا کرکٹ کے صدر اور دیگر اعلیٰ عہدیداران نے چیئرمین پی سی بی سے ملاقات کی اور دوطرفہ امور پر تبادلہ خیال کیا۔

دونوں بورڈز کے حکام نے کرکٹ کے فروغ اور باہمی تعاون کو مزید وسعت دینے کے عزم کا اعادہ کیا۔ ملاقات میں باہمی سیریز، کھلاڑیوں کے تبادلے اور کرکٹ ڈویلپمنٹ پروگرامز کے حوالے سے بھی بات چیت کی گئی۔

محسن نقوی نے اس موقع پر کہا کہ کرکٹ نہ صرف ایک جنٹلمین گیم ہے بلکہ یہ محبت اور قربتیں بڑھانے کا بھی ذریعہ ہے۔ انہوں نے کولمبو آمد پر خوشی کا اظہار کرتے ہوئے سری لنکن کرکٹ بورڈ کی میزبانی کو سراہا۔

واضح رہے کہ چیئرمین پی سی بی نے دورہ سری لنکا کے دوران قومی کرکٹ ٹیم کے کھلاڑیوں اور مینجمنٹ سے بھی ملاقات کی اور ان کی کارکردگی پر اطمینان کا اظہار کیا۔