قومی ہاکی کھلاڑیوں کی چیئرمین پی سی بی سے ملاقات، محسن نقوی کی ہاکی فیڈریشن کاصدربننے کی تردید

صدرپاکستان  ہاکی فیڈریشن طارق بگٹی کے مستعفی ہونے کے بعد قومی ہاکی ٹیم کے کھلاڑیوں نے قذافی اسٹیڈیم لاہورمیں  چئیرمین پاکستان کرکٹ بورڈ محسن نقوی سے ملاقات  کی اور آسٹریلیا میں پرو ہاکی لیگ کے ناخوشگوار واقعات سے آگاہ کیا۔

محسن نقوی نے ہاکی پلئیرز کے ساتھ ناروا سلوک پر افسوس کا اظہار کیا اور کہاکہ ہاکی کے کھلاڑیوں کا ہرطرح سے خیال رکھا جائے گا۔معاملات کے حل کےلیے پوراتعاون کیاجائے گا۔پی سی بی چیئرمین نے حکام کو ہدایت دی کہ مصر میں ہونےو الے ورلڈ کپ کوالیفائر ٹورنامنٹ کے لیےٹیم کے لیے فوری طور پر فضائی ٹکٹ، کھیلوں کے سامان اور ہوٹل رہائش کا بندوبست کیا جائے۔

انہوں نے یہ بھی حکم دیا کہ جمعہ سے کھلاڑیوں کے لیے تربیتی کیمپ قائم کیا جائے اور تمام تیاریاں جمعرات کی رات تک مکمل کر لی جائیں۔محسن نقوی نے مزید ہدایت کی کہ زخمی کھلاڑیوں کو پی سی بی کی نگرانی میں فوری طبی سہولیات فراہم کی جائیں ۔ انہوں نے کھلاڑیوں سے کہا کہ آپ صرف کھیل پر توجہ دیں، پاکستان کی عزت سب سے پہلے ہے، ہم کسی بھی صورت میں ملک کے وقار کو مجروح نہیں ہونے دیں گے۔ملاقات کے دوران محسن نقوی نے حالیہ قومی ہاکی ٹورنامنٹ میں رنر اپ رہنے پر کھلاڑیوں میں فی کس 10 لاکھ روپے کے چیک بھی تقسیم کیے، جو ایک سابقہ اعلان کی تکمیل تھی۔

بعد میں محسن نقوی نےسوشل میڈیاپر بیان میں واضح کیا کہ وہ پاکستان ہاکی فیڈریشن کے صدر نہیں بن رہے، تاہم بحران کے خاتمے تک کھلاڑیوں کی مدد جاری رکھیں گے۔واضح رہے کہ محسن نقوی سے ملاقات کے بعد قومی ہاکی ٹیم کے کپتان عماد بٹ نے دعویٰ کیا تھا کہ قومی ہاکی ٹیم کے تمام معاملات چیئرمین پی سی بی محسن نقوی دیکھیں گے۔