محمد عامرنوٹنگھم شائر میں بطور ڈومیسٹک کھلاڑی شامل ہوگئے

پاکستان کے تجربہ کار اور مایہ ناز فاسٹ بولر محمد عامر انگلش کاؤنٹی کلب نوٹنگھم شائر میں بطور ڈومیسٹک (مقامی) کھلاڑی شامل ہو گئے ہیں۔نوٹنگھم شائر کاؤنٹی کرکٹ کلب کی جانب سے جاری کردہ باضابطہ بیان کے مطابق، محمد عامر کے ساتھ ویٹالٹی ٹی ٹوئنٹی بلاسٹ کے بقیہ میچز کے لیے ایک مختصر مدتی معاہدہ کیا گیا ہے۔ کلب انتظامیہ نے محمد عامر کو ٹیم میں خوش آمدید کہتے ہوئے اس امید کا اظہار کیا ہے کہ ان کا طویل بین الاقوامی تجربہ ٹورنامنٹ کے اہم مرحلے پر ٹیم کے لیے انتہائی مفید ثابت ہوگا۔

اس معاہدے کی سب سے خاص بات یہ ہے کہ برطانوی پاسپورٹ (برطانوی شہریت) رکھنے کے باعث محمد عامر کو نوٹنگھم شائر کی ٹیم میں اوورسیز (غیر ملکی) پلیئر کے طور پر شمار نہیں کیا جائے گا، بلکہ وہ بطور مقامی کھلاڑی ایکشن میں نظر آئیں گے۔اس موقع پر اپنے خیالات کا اظہار کرتے ہوئے محمد عامر نے گہری مسرت کا اظہار کیا اور کہا کہ وہ ویٹالٹی بلاسٹ میں نوٹنگھم شائر کا حصہ بننے پر بے حد خوش ہیں۔ انہوں نے مزید کہا کہ انہوں نے نوٹنگھم شائر کے شاندار ماحول اور کرکٹ کے بارے میں بہت کچھ سن رکھا ہے اور وہ اس تاریخی کلب کی نمائندگی کرنے کے لیے پوری طرح پرجوش ہیں۔