لاپتہ افراد کے کیسز کے اعداد و شمار جاری، خیبر پختونخوا میں 970 کیسز زیر تفتیش

جنوری 2026 تک خیبر پختونخوا میں لاپتا افراد کے 3 ہزار 730 کیسز رپورٹ ہوئے، جن میں سے 2 ہزار 760 کیسز نمٹائے جا چکے ہیں جبکہ 970 کیسز زیرتفتیش ہیں۔ سرکاری دستاویز کے مطابق صوبے میں 1 ہزار 804 لاپتا افراد کو ٹریس کیا جا چکا ہے۔

707 افراد اپنے گھروں کو واپس پہنچے، 861 افراد انٹرنمنٹ سینٹرز میں پائے گئے، 148 افراد مختلف جیلوں میں موجود ہیں جبکہ 88 افراد کی لاشیں ملی ہیں۔ ملک بھر میں لاپتا افراد کے کیسز کی تعداد 10 ہزار 806 تک پہنچ گئی ہے۔

صوبہ وار اعداد و شمار کے مطابق پنجاب میں 1 ہزار 794 کیسز رپورٹ ہوئے، سندھ میں 1 ہزار 868، بلوچستان میں 2 ہزار 917، اسلام آباد میں 416، آزاد کشمیر میں 71 اور گلگت بلتستان میں 10 کیسز رپورٹ ہوئے۔ جنوری 2026 تک ملک بھر میں 9 ہزار 259 کیسز نمٹائے جا چکے ہیں۔