میرپور آزاد کشمیر ڈویژن کے تین اضلاع کے 13 حلقوں میں انتخابات کل ہونگے

میرپور آزاد کشمیر ڈویژن کے تین اضلاع (میرپور، بھمبر اور کوٹلی) کے 13 حلقوں میں عام انتخابات کا معرکہ کل سجنے جا رہا ہے، جس کے لیے الیکشن کمیشن نے تمام انتظامات مکمل کر لیے ہیں۔ ڈی آر او دفاتر سے پریذائیڈنگ افسران کی نگرانی میں بیلٹ پیپرز اور دیگر انتخابی سامان سخت سکیورٹی کی حصار میں پولنگ اسٹیشنز منتقل کر دیا گیا ہے۔ انتخابی مہم کی مدت ختم ہونے کے بعد امیدواروں کی آخری سرگرمیاں مکمل ہو چکی ہیں اور اب میرپور کی 4، بھمبر کی 3 اور کوٹلی کی 6 نشستوں پر پیپلزپارٹی، مسلم لیگ (ن)، پی ٹی آئی کے حمایت یافتہ آزاد امیدواروں اور استحکام پاکستان پارٹی کے درمیان کانٹے دار مقابلے متوقع ہیں۔ آزاد کشمیر کے سابق وزیراعظم چوہدری انوارالحق (آزاد) اور طارق فاروق (ن لیگ) سمیت کئی اہم رہنماؤں کے درمیان سنسنی خیز مقابلے دیکھنے کو ملیں گے۔