اسلام آباد میں کوئی سڑک بند نہیں، شہریوں کے تحفظ کیلئے کنٹینرز رکھے: وزارت اطلاعات

وفاقی وزارتِ اطلاعات و نشریات نے غیر ملکی نشریاتی ادارے کی جانب سے وفاقی دارالحکومت میں سڑکوں کی بندش سے متعلق شائع کردہ رپورٹ کو یکسر غلط، یکطرفہ اور گمراہ کن قرار دیتے ہوئے مسترد کر دیا ہے۔ ترجمان وزارتِ اطلاعات نے وضاحت کی ہے کہ اسلام آباد میں تمام مرکزی سڑکیں اور شاہراہیں آمدورفت کے لیے کھلی ہیں، جبکہ اسلام آباد ہائیکورٹ کے احکامات کی روشنی میں شہریوں کے تحفظ اور امن و امان کی صورتحال برقرار رکھنے کے لیے چند مخصوص مقامات پر سیکیورٹی کے پیشِ نظر کنٹینرز رکھے گئے ہیں۔

ترجمان کے مطابق یہ حفاظتی اقدامات ماضی میں رونما ہونے والے پرتشدد واقعات اور انتشاری رویوں کو مدنظر رکھتے ہوئے ریاست کی بنیادی ذمہ داری اور عدالتی احکامات کے تحت کیے گئے ہیں۔ وزارتِ اطلاعات نے افسوس کا اظہار کرتے ہوئے کہا کہ غیر ملکی ٹی وی نے حقائق کو نظر انداز کر کے ان سیکیورٹی تدابیر کو سڑکوں کی بندش کے طور پر پیش کیا تاکہ منفی تاثر پیدا کیا جا سکے۔ بیان میں مزید کہا گیا کہ اس قسم کی گمراہ کن اور پروپیگنڈا رپورٹنگ سے زمینی حقائق کو تبدیل نہیں کیا جا سکتا۔