صوبائی وزیر مینا خان آفریدی کو بیرون ملک سفر سے روک دیا گیا

پشاور ائیرپورٹ پر خیبرپختونخوا کے صوبائی وزیر مینا خان آفریدی کو بیرون ملک روانگی سے روک دیا گیا، جس پر صورتحال تنازع کا شکار ہو گئی ہے۔

ذرائع کے مطابق وہ ابوظہبی کے ذریعے جرمنی جا رہے تھے، تاہم ایف آئی اے حکام نے انہیں امیگریشن سے پہلے ہی سفر کرنے سے روک دیا۔

مینا خان آفریدی نے مؤقف اختیار کیا ہے کہ پشاور ہائی کورٹ نے واضح طور پر انہیں بیرون ملک جانے کی اجازت دی تھی اور متعلقہ حکام کو روکنے سے منع کیا گیا تھا۔

واضح رہے کہ وزیر نے ای سی ایل سے نام نکلوانے کے لیے عدالت سے رجوع کیا تھا، جس پر عدالت نے انہیں سفر کی اجازت دینے کا حکم جاری کیا تھا۔

وزیر کی جانب سے ایف آئی اے حکام کے خلاف توہین عدالت کی درخواست دائر کرنے کا عندیہ بھی دیا گیا ہے۔