جنگ کا 34 واں روز: یو اے ای آبنائے ہرمز بزور طاقت کھلوانے کیلئے تیار: امریکی اخبار

واشنگٹن/تہران: مشرقِ وسطیٰ کی جنگ اپنے 34 ویں روز میں داخل ہوتے ہی ایک خطرناک موڑ پر آ گئی ہے۔ امریکی صدر ڈونلڈ ٹرمپ نے وائٹ ہاؤس سے 19 منٹ کے سخت ترین خطاب میں ایران کو الٹی میٹم دیا ہے کہ اگر دو سے تین ہفتوں میں ڈیل نہ ہوئی تو ایران کے تمام بجلی گھروں کو نشانہ بنا کر اسے “پتھر کے دور” میں دھکیل دیا جائے گا۔ ٹرمپ نے جنگ بندی کو آبنائے ہرمز کھولنے سے مشروط کر دیا ہے۔

جواب میں ایرانی مسلح افواج کے ترجمان ابراہیم ذوالفقاری نے دوٹوک کہا ہے کہ حملہ آوروں کے پاؤں کاٹ دیے جائیں گے۔ ایرانی پارلیمانی نیشنل سکیورٹی کمیشن کے سربراہ ابراہیم عزیزی نے ٹرمپ کے ‘رجیم چینج’ کے خواب کو مضحکہ خیز قرار دیتے ہوئے واضح کیا کہ آبنائے ہرمز دشمن کے لیے کبھی نہیں کھلے گی۔

جنگ کا دائرہ کار اب خلیج کے دیگر ممالک تک پھیل چکا ہے۔ ایران نے یو اے ای، قطر، کویت اور بحرین میں امریکی اڈوں پر میزائلوں اور ڈرونز کی برسات کر دی ہے، جس میں 37 امریکی فوجیوں کی ہلاکت اور ایواکس (AWACS) طیاروں کی تباہی کا دعویٰ کیا گیا ہے۔ دبئی اور تل ابیب میں بھی دھماکے سنے گئے ہیں، جبکہ بن گوریان ایئرپورٹ پر بھی حملے کی اطلاعات ہیں۔