عالمی منڈی میں خام تیل کی قیمتوں میں مسلسل اضافہ

مشرقِ وسطیٰ میں بڑھتی ہوئی کشیدگی کے باعث عالمی منڈی میں خام تیل کی قیمتوں میں اضافے کا سلسلہ مسلسل جاری ہے۔ برینٹ خام تیل کی قیمت 100.5 ڈالر فی بیرل تک پہنچ گئی ہے جو گزشتہ 2 ماہ کی بلند ترین سطح ہے، جبکہ ویسٹ ٹیکساس انٹرمیڈیٹ (WTI) کی قیمت بھی بڑھ کر 91.65 ڈالر فی بیرل ہو گئی ہے۔ خطے میں جاری کشیدگی کے باعث آبنائے ہرمز سے گزرنے والے آئل ٹینکرز کی آمد و رفت شدید متاثر ہوئی ہے اور جمعرات کو صرف 1 آئل ٹینکر “نیو جائنٹ” ہی اس گزرگاہ سے گزر سکا، جس میں تقریباً 20 لاکھ بیرل عراقی خام تیل لدا تھا اور وہ چین کی ریژاؤ بندرگاہ کی جانب روانہ ہوا۔