متعدد بین الاقوامی ایئر لائنز نے مشرق وسطیٰ کے ملکوں کیلئے پروازیں منسوخ یا معطل کر دیں

امریکا اور ایران کے درمیان تیزی سے بڑھتے ہوئے فوجی اور سفارتی تناؤ کے باعث مشرقِ وسطیٰ کی فضائی حدود غیر محفوظ ہو گئی ہیں، جس کے نتیجے میں متعدد بڑی بین الاقوامی ایئر لائنز نے خطے کے مختلف ممالک کے لیے اپنی پروازیں منسوخ یا عارضی طور پر معطل کرنے کا اعلان کیا ہے۔ فضائی کمپنیوں کے مطابق یہ اقدامات مسافروں اور عملے کی سکیورٹی کو یقینی بنانے کے لیے کیے جا رہے ہیں۔

تفصیلات کے مطابق، ایئر کینیڈا نے تل ابیب (اسرائیل) اور دبئی کے لیے اپنے تمام فضائی آپریشنز 24 اکتوبر تک مکمل طور پر منسوخ کر دیے ہیں۔ اسی طرح یونان کی سب سے بڑی فضائی کمپنی نے بھی دبئی کے لیے اپنی پروازیں 31 اگست تک، جبکہ عراق کے شہروں اربیل اور بغداد کے لیے پروازیں 30 ستمبر تک معطل رکھنے کا فیصلہ کیا ہے۔ ایئر فرانس نے لبنان کے دارالحکومت بیروت کے لیے فضائی سروس 2 اگست تک روک دی ہے، جبکہ ہالینڈ کی فضائی کمپنی کے ایل ایم (KLM) نے سعودی عرب کے شہروں ریاض، دمام اور متحدہ عرب امارات کے شہر دبئی کے لیے اپنی پروازیں 15 جولائی تک معطل رکھیں۔ دوسری جانب، ہانگ کانگ کی نامور فضائی کمپنی کیتھے پیسفک نے حالات میں بہتری کی امید ظاہر کرتے ہوئے اعلان کیا ہے کہ وہ یکم ستمبر سے دبئی اور ریاض کے لیے اپنی معطل شدہ پروازیں دوبارہ بحال کرنے کا ارادہ رکھتی ہے۔