وسطی میکسیکو میں چھوٹے طیارے کو حادثہ ، 7 افراد ہلاک ہوگئے

وسطی میکسیکو میں ایک چھوٹا طیارہ ہنگامی لینڈنگ کی کوشش کے دوران گر کر تباہ ہو گیا، جس کے نتیجے میں 7 افراد جاں بحق ہو گئے۔

حکام کے مطابق حادثہ سان ماتیو آٹینکو کے صنعتی علاقے میں پیش آیا، جو ٹولوکا ایئرپورٹ سے تقریباً 5 کلومیٹر جبکہ میکسیکو سٹی سے 50 کلومیٹر مغرب میں واقع ہے۔ طیارے نے بحرالکاہل کے ساحلی شہر آکاپولکو سے پرواز بھری تھی۔

حکام کا کہنا ہے کہ طیارہ ایک فٹ بال گراؤنڈ پر لینڈ کرنے کی کوشش کر رہا تھا کہ اس دوران قریبی ویئر ہاؤس کی چھت سے ٹکرا گیا، جس کے باعث شدید آگ بھڑک اٹھی۔ آگ لگنے کے نتیجے میں علاقے سے تقریباً 130 افراد کو احتیاطی طور پر محفوظ مقام پر منتقل کیا گیا۔

نجی طیارے میں 8 مسافر اور عملے کے 2 افراد سوار تھے، تاہم حادثے کی وجوہات فوری طور پر معلوم نہ ہو سکیں۔ واقعے کی تحقیقات شروع کر دی گئی ہیں۔