وفاقی وزیر پیٹرولیم سے ورلڈ بینک کنٹری ڈائریکٹر کی ملاقات، گیس شعبے میں اصلاحات پر تبادلۂ خیال

اسلام آباد میں وفاقی وزیرِ پیٹرولیم علی پرویز ملک سے پاکستان کے لیے ورلڈ بینک کی کنٹری ڈائریکٹر محترمہ بولورما امگابازار نے ملاقات کی۔ ملاقات کے دوران پاکستان کے گیس شعبے بالخصوص ایل این جی سے متعلق امور اور جاری و آئندہ اصلاحات پر تفصیلی تبادلۂ خیال کیا گیا۔

ورلڈ بینک کی کنٹری ڈائریکٹر نے اس موقع پر کہا کہ پیٹرولیم ڈویژن نے ایل این جی سرپلس کے مسئلے کو کامیابی سے حل کیا ہے، جبکہ ایل این جی کے چیلنج سے نمٹنا آسان کام نہیں تھا۔ انہوں نے حکومتِ پاکستان کی کوششوں کو سراہا۔

وفاقی وزیر پیٹرولیم علی پرویز ملک نے ایل این جی مسئلے کے حل میں حکومتی اقدامات کو تسلیم کرنے پر ورلڈ بینک کی کنٹری ڈائریکٹر کا شکریہ ادا کیا۔ انہوں نے کہا کہ ورلڈ بینک جیسے بین الاقوامی شراکت داروں کی آراء پائیدار پالیسی اصلاحات کے لیے نہایت اہمیت رکھتی ہیں۔

ملاقات میں پاکستان کے گیس شعبے کی پائیداری کے لیے جاری اور مستقبل کی اصلاحات پر بھی بات چیت کی گئی۔ ورلڈ بینک کنٹری ڈائریکٹر نے بتایا کہ ورلڈ بینک گیس کے شعبے میں اصلاحات کے لیے ایک جامع روڈ میپ تیار کر رہا ہے۔

اس کے علاوہ ورلڈ بینک نے ایل پی جی کے شعبے میں اصلاحات اور آئل اینڈ گیس ریگولیٹری اتھارٹی (اوگرا) کی استعداد کار میں اضافے کے لیے پاکستان کے ساتھ باہمی تعاون پر آمادگی کا اظہار بھی کیا۔