اسپیکر قومی اسمبلی سے یورپی یونین کے سفیر کی ملاقات

اسلام آباد: اسپیکر قومی اسمبلی سردار ایاز صادق سے یورپی یونین کے سفیر رائمنڈاس کاروبلس نے پارلیمنٹ ہاؤس میں ملاقات کی۔ اسپیکر قومی اسمبلی نے یورپی یونین کے سفیر کی آمد پر ان کا خیر مقدم کیا۔

ملاقات میں پاکستان اور یورپی یونین کے درمیان دوطرفہ تعلقات، باہمی تعاون، پارلیمانی سفارت کاری اور اہم علاقائی و عالمی امور پر تفصیلی تبادلۂ خیال کیا گیا۔ دونوں فریقین نے پاکستان اور یورپی یونین کے تعلقات کو مزید مستحکم بنانے اور مختلف شعبہ جات میں تعاون اور سرمایہ کاری بڑھانے پر اتفاق کیا۔

اسپیکر سردار ایاز صادق نے پاکستان اور یورپی یونین کے درمیان خوشگوار تعلقات کے فروغ کے عزم کا اعادہ کرتے ہوئے پارلیمانی روابط کو مضبوط بنانے پر زور دیا۔

یورپی یونین کے سفیر نے پاکستان کو جی ایس پی پلس اسٹیٹس ملنے پر مبارکباد دی اور کہا کہ پاکستانی تارکین وطن یورپی ممالک کی ترقی اور خوشحالی میں نمایاں کردار ادا کر رہے ہیں۔

اس موقع پر اسپیکر قومی اسمبلی نے یوکرین میں قیام امن اور روس۔یوکرین جنگ کے پرامن حل کیلئے نیک خواہشات کا اظہار کیا۔