میر رضا قتل کیس: مقتول کی کیمیائی رپورٹ میں اہم انکشافات

نوجوان تاجر میر رضا علی قتل کیس میں پیش رفت سامنے آئی ہے جہاں جامعہ کراچی کی کیمیکل لیبارٹری کی جانب سے کیمیائی رپورٹ متعلقہ ادارے کو جاری کر دی گئی ہے۔ ذرائع کے مطابق اس کیمیائی رپورٹ کا ڈی این اے لیبارٹری سے کوئی تعلق نہیں ہے۔ رپورٹ میں انکشاف ہوا ہے کہ مقتول میر رضا کو پیچھے سے گولی ماری گئی، کیونکہ ان کی قمیض کے پچھلے حصے کے مقابلے میں اگلے حصے میں چھ گنا بڑا سوراخ پایا گیا۔ مزید برآں، مقتول کی قمیض پر تیزاب کے اثرات اور ان کے خون میں بے ہوشی کی دوا کے شواہد بھی ملے ہیں۔

دوسری جانب، جوڈیشل مجسٹریٹ شرقی کی عدالت میں کیس کی سماعت کے دوران سابق تفتیشی افسر نے پیش ہو کر رپورٹ جمع کروانے کے لیے مزید مہلت مانگی۔ تفتیشی افسر نے عدالت کو بتایا کہ اعلیٰ حکام کی جانب سے کیس کا تفتیشی افسر تبدیل کر دیا گیا ہے اور نئے تفتیشی افسر آئندہ سماعت پر پیش ہوں گے۔ عدالت نے استدعا منظور کرتے ہوئے تفتیشی ٹیم کو 15 اگست تک حتمی رپورٹ جمع کروانے کا حکم دے دیا۔