ہمیں آزمانے کی کوشش نہ کریں، ورنہ بڑی آزمائش بنیں گے: مولانا فضل الرحمان

جمعیت علمائے اسلام (جے یو آئی) کے سربراہ مولانا فضل الرحمان نے خبردار کیا ہے کہ انہیں آزمانے کی کوشش نہ کی جائے، ورنہ وہ ایک بڑی آزمائش ثابت ہوں گے۔
راولپنڈی میں توحید و سنت کانفرنس سے خطاب کرتے ہوئے مولانا فضل الرحمان نے حکمرانوں پر زور دیا کہ وہ ایمان کی نعمت کی حفاظت کریں، کیونکہ عدل کے ترازو قیامت کے روز قائم کیے جائیں گے۔

انہوں نے کہا کہ علما کے پیچھے برصغیر کی ڈھائی سو سالہ جدوجہد اور قربانیوں کی تاریخ موجود ہے، کامیابی نعروں سے نہیں بلکہ عملی کام سے حاصل ہوتی ہے۔
سربراہ جے یو آئی کا کہنا تھا کہ جو ادارے حکمرانوں کے قریب گئے، ان کی حالت سب کے سامنے ہے، جبکہ جے یو آئی نے ہمیشہ مذاکرات کا راستہ اپنایا اور آئین سازی بھی بات چیت کے ذریعے ممکن بنائی۔