جے یو آئی کی مرکزی کور کمیٹی کا اجلاس، سیاسی صورتحال پر غور

جمعیت علماء اسلام (جے یو آئی) کی مرکزی کور کمیٹی کا اہم اجلاس جے یو آئی کے سربراہ مولانا فضل الرحمان کی زیر صدارت منعقد ہوا، جس میں ملک کی موجودہ سیاسی صورتحال کا باریک بینی سے جائزہ لیا گیا۔ اجلاس کے دوران اپوزیشن اور حکومت کے درمیان ہونے والے مذاکرات کے تمام پہلوؤں پر تفصیلی غور و خوض کیا گیا، جبکہ مولانا فضل الرحمان نے شرکا کو حالیہ دنوں اپوزیشن اور حکومتی رہنماؤں سے ہونے والی ملاقاتوں کی تفصیلات سے آگاہ کیا۔ اجلاس کے شرکا نے اس بات پر زور دیا کہ ملک اس وقت کسی قسم کی سیاسی کشمکش کا متحمل نہیں ہو سکتا، اس لیے تمام سیاسی مسائل کو تصادم کے بجائے باہمی افہام و تفہیم اور مذاکرات کے ذریعے حل کیا جانا چاہیے۔ اجلاس میں مولانا عبد الغفور حیدری، خواجہ خلیل احمد، محمد اسلم غوری، سینیٹر کامران مرتضیٰ، مولانا صلاح الدین ایوبی اور مفتی ابرار نے بھی شرکت کی۔