مدینہ منورہ پر حملہ عالم اسلام کے دل اور عقیدے پر حملہ ہے، مسلم حکمران مصلحتیں بالائے طاق رکھ کر مضبوط اتحاد قائم کریں: مولانا فضل الرحمان

جمعیت علماء اسلام (ف) کے سربراہ مولانا فضل الرحمان نے مدینہ منورہ پر حوثی ملیشیا کے حملے کی شدید ترین الفاظ میں مذمت کرتے ہوئے کہا ہے کہ امن و سلامتی کے علمبردار سرورِ کائنات صلی اللہ علیہ وسلم کے شہر پر حملہ سفاکیت کی انتہا ہے جو دراصل کسی ایک شہر پر نہیں بلکہ پورے عالم اسلام کے دل اور عقیدے پر حملہ ہے۔ انہوں نے خادم الحرمین الشریفین شاہ سلمان، ولی عہد محمد بن سلمان اور سعودی عوام سے مکمل یکجہتی کا اظہار کرتے ہوئے کہا کہ حضور اکرم کے مقدس شہر کی حرمت اور تحفظ کے لیے اپنی جان، مال اور اولاد کی قربانی کو باعثِ فخر سمجھتے ہیں۔ مولانا فضل الرحمان نے زور دیا کہ مسلم حکمران اور امتِ مسلمہ مصلحتیں بالائے طاق رکھ کر حملہ آوروں کا مقابلہ کریں اور حرمین شریفین کے تحفظ کے لیے اب ایک مؤثر اسلامی بلاک کا قیام ناگزیر ہو چکا ہے۔