ایران افزودگی کے حق سے کبھی دستبردار نہیں ہوگا، ایرانی عہدیدار

ایک اعلیٰ ایرانی عہدیدار نے معروف خبر رساں ادارے رائٹرز سے گفتگو کرتے ہوئے واضح کیا ہے کہ ایران اپنے جوہری پروگرام کے تحت یورینیم کی افزودگی کے بنیادی حق سے کبھی دستبردار نہیں ہوگا۔ ایرانی عہدیدار نے امریکی نائب صدر جے ڈی وینس کے بیانات پر تبصرہ کرتے ہوئے کہا کہ وہ دراصل واشنگٹن کے مطالبات اور تجاویز ہیں، جو تہران کے مؤقف سے مکمل طور پر متصادم ہیں۔ انہوں نے انکشاف کیا کہ اس وقت جوہری پروگرام کے معاملے پر امریکا اور ایران کے درمیان براہِ راست یا بلاواسطہ کوئی مذاکرات نہیں ہو رہے، اور کسی بھی قسم کی بات چیت کا آغاز کرنے سے پہلے امریکا کو تہران کی عائد کردہ شرائط کو پورا کرنا ہوگا۔ ان کا مزید کہنا تھا کہ جوہری مواد کی افزودگی کی تکنیکی تفصیلات اور دیگر امور پر مذاکرات بعد میں کیے جا سکتے ہیں۔