عمران سے ملاقات کے بغیر مذاکرات آگے نہیں بڑھ سکتے: محمود اچکزئی

پشتونخوا ملی عوامی پارٹی کے سربراہ اور قومی اسمبلی میں اپوزیشن لیڈر محمود خان اچکزئی نے ژوب میں ایک بڑے جلسہ عام سے خطاب کرتے ہوئے واضح کیا ہے کہ بانی پی ٹی آئی سے ملاقات کے بغیر ملک میں مذاکرات کا سلسلہ آگے نہیں بڑھ سکتا۔ انہوں نے کہا کہ اگر حکومت سنجیدگی سے سیاسی بحران کا حل چاہتی ہے تو پہلے اپوزیشن رہنماؤں کو بانی پی ٹی آئی سے ملنے کی اجازت دی جائے تاکہ ان کا مؤقف جان کر بات چیت کو آگے بڑھایا جا سکے۔ محمود خان اچکزئی نے خیبر پختونخوا میں گورنر راج کی افواہوں پر شدید ردعمل ظاہر کرتے ہوئے خبردار کیا کہ صوبے میں گورنر راج کسی صورت قبول نہیں کیا جائے گا اور اگر ایسا کوئی اقدام اٹھایا گیا تو ملک بھر کے چوراہے بند کر کے بھرپور مزاحمت کی جائے گی۔ انہوں نے زور دیا کہ موجودہ سیاسی بحران کا واحد حل آئین کی بالادستی اور بامقصد مذاکرات میں پوشیدہ ہے۔