ٹیکنالوجی سے مستفید نوجوان ہی ملکی ترقی میں کلیدی کردار ادا کرسکتا ہے، مریم نواز

وزیراعلیٰ پنجاب مریم نواز شریف نے “ورلڈ یوتھ سکلز ڈے” (نوجوانوں کے ہنر کے عالمی دن) کے موقع پر اپنے خصوصی پیغام میں صوبے کے نوجوانوں کو ٹیکنالوجی اور جدید پیشہ ورانہ مہارتوں سے لیس کرنے کے پختہ عزم کا اعادہ کیا ہے۔ انہوں نے نوجوانوں پر زور دیا کہ وہ فری لانسنگ، آئی ٹی اور جدید ٹیکنیکل شعبوں کا رخ کریں کیونکہ ٹیکنالوجی کی طاقت سے لیس نوجوان ہی ملک کی تیز رفتار ترقی اور خوشحالی میں کلیدی کردار ادا کر سکتا ہے۔ انہوں نے کہا کہ نوجوان کسی بھی قوم کا سب سے قیمتی اثاثہ اور روشن مستقبل کے معمار ہوتے ہیں۔

پنجاب حکومت کی جانب سے اٹھائے گئے عملی اقدامات کا تذکرہ کرتے ہوئے وزیراعلیٰ کا کہنا تھا کہ صوبے میں نوجوانوں کو ہنرمند بنانے کے لیے خطیر فنڈز مختص کیے گئے ہیں۔ پنجاب حکومت کی “آسان کاروبار اور آسان فنانس اسکیم” کے تحت اب تک ایک لاکھ 8 ہزار سے زائد افراد کو بلاسود قرضے فراہم کیے جا چکے ہیں، جس کے تحت نوجوانوں کو اپنا کاروبار شروع کرنے کے لیے 10 لاکھ سے لے کر 3 کروڑ روپے تک کے آسان قرضے دیے جا رہے ہیں۔ اس کے علاوہ “ایگریکلچر انٹرن شپ پروگرام” کے تحت 2 ہزار نوجوانوں کو 60 ہزار روپے ماہانہ وظیفہ دیا جا رہا ہے۔

ٹیکنیکل ٹریننگ اور بین الاقوامی روزگار کے حوالے سے گفتگو کرتے ہوئے مریم نواز شریف نے بتایا کہ پنجاب کے ووکیشنل ٹریننگ انسٹی ٹیوٹس میں عالمی معیار کے مطابق کنسٹرکشن، میسن، ویلڈر، ٹائل فکسر اور ہیوی وہیکل مینٹیننس جیسے جدید کورسز کروائے جا رہے ہیں۔ انھی پروگرامز کے تحت پنجاب بھر سے 10 ہزار نوجوانوں کو بین الاقوامی مارکیٹ کی ضروریات کے مطابق سعودی عرب اور خلیجی ممالک میں باعزت ملازمتیں فراہم کی گئی ہیں۔

وزیراعلیٰ نے مزید بتایا کہ پنجاب کی تاریخ میں پہلی مرتبہ نصاب کے اندر ای کامرس، ڈیجیٹل مارکیٹنگ اور جدید آئی ٹی کورسز شامل کیے گئے ہیں۔ مزید برآں، خواتین کو خود مختار بنانے کے لیے شروع کیے گئے خصوصی “سحر پروگرام” کے تحت صوبے بھر کی 5,365 خواتین کو بیوٹیفکیشن، ہاسپیٹلٹی اور ایئرلائن مینجمنٹ جیسے جدید ترین کورسز مفت کروائے جا رہے ہیں، اور اس تربیتی پروگرام کے دوران خواتین کو مفت لیپ ٹاپ کے ساتھ ساتھ 7,500 روپے ماہانہ وظیفہ بھی دیا جا رہا ہے۔